الصمان

يقولون يا شي ٍ كسا الأرض فالصمان // وأنا أقول خابر دامها وسط ريضانه

على شانها ما توصف الا على الأمزان // كما الغيث لا حوّل على الأرض هتانه

نداها يبلل عودها الفارع الريان // وأنا أعوذها بالله من ابليس وأعوانه

تنامى زهرها والرغد تلبسه فستان // من الماء تشّكل بس في صورة إنسانه

ومن كثر ماهي مزهره خوفي البدوان // عليها تسوق الذود وتسوق حيرانه

وهي تنوكل بالعين وتشبّع الوجدان // وأنا أشرب غلاها والمعاليق رويانه

عليها الغرام يخالط الدم فالشريان // على دورة عروقي ونبضات شريانه

لهذا السبب مرة وأنا مُنهك وتعبان // عصيت الطبيب وكل هذا على شانه

يبيله قزازة دم من دمي الخرمان // وأخاف إن عطيته دم ينقص غلا فلانه